ពលរដ្ឋខេត្តបាត់ដំបងបារម្ភពីអសន្តិសុខសង្គមបន្ទាប់ពីកើតមានល្បែងភ្នាល់ទឹកភ្លៀង
25-May-2016 | ដោយ មែន កំសត់
ខេត្តបាត់ដំបង៖ ប្រជាពលរដ្ឋរស់នៅសង្កាត់អូរចារ និងសង្កាត់រតនៈ ក្រុងបាត់ដំបងខេត្តបាត់ដំបងបារម្ភពីល្បែងស៊ីសងនៅមូលដ្ឋានកើតមាន យ៉ាងអនាធិបតេយ្យ ពុំឃើញមានការទប់ស្កាត់ពីសមត្ថកិច្ចឡើយ។ ពួកគេអះអាងថា បន្ទាប់ពីមានល្បែងស៊ីសងនោះ បណ្ដាលឲ្យកើតមាននូវបាតុភាព ដូចជាចោរកម្ម និងអំពើហិង្សា ជាដើម។ប្រជាពលរដ្ឋឲ្យដឹងថាល្បែងស៊ីសងដូចជា បៀ អាប៉ោង កន្ទុយលេខ និងជល់មាន់ល្បែងភ្នាល់ទឹកភ្លៀងជាពិសេសគ្រឿងញៀន បានកើតមាននៅមូលដ្ឋានបណ្ដាលឲ្យពលរដ្ឋមួយចំនួនងប់ងុលល្បែងនេះរហូត ខ្ចីបុលគេ លក់ទ្រព្យសម្បត្តិ បញ្ចាំ ហើយអាចឈានដល់កើតអំពើហិង្សាក្នុងគ្រួសារថែនទៀតផង។ពលរដ្ឋម្នាក់ រស់នៅសង្កាត់អូរចារបាននិយាយថា បើរដ្ឋាភិបាល និងស្ថាប័នពាក់ព័ន្ធនៅព្រងើយកន្តើយមិនចាត់វិធានការករណីនេះទេ នឹងប៉ះពាល់ជីវភាពប្រជាពលរដ្ឋធ្ងន់ធ្ងរ។
លោកបន្តថា ល្បែងជល់មាន់ និងអាប៉ោងភ្នាល់ទឹកភ្លៀង បានកើតយ៉ាងគគ្រឹកគគ្រេង។ ពួកគាត់សំណូមពរលោកចៅហ្វាយខេត្ត លោកចុះបិទបន្តិចផង បើមិនអ៊ីចឹងទេ ប្រជាជនខ្មែរក្រដោយសារតែល្បែងនេះឯង។ តាំងពីមានល្បែងនេះ លួចក៏លួច ប្លន់ក៏ប្លន់ មិនដែលឃើញបង្ក្រាប ទេ។ពួកគាត់បានរិះគន់ថា លោក យឹម វិចិត្រ អធិការនគរបាលក្រុងបាត់ដំបង ដែលមានលោក ស ថេត ស្នងការនគរបាលខេត្តបាត់ដំបង ជាខ្នងបង្អែកមិនយកចិត្តទុកដាក់លុបបំបាត់បទល្មើសផ្សេងៗ ដើម្បីពង្រឹងសន្តិសុខសង្គមនោះទេ។ ហេតុនេះហើយទើបបទល្មើសជួញដូរចែកចាយ ប្រើប្រាស់គ្រឿងញៀន រាលដាលកាន់តែខ្លាំងឡើងៗនៅក្នុងក្រុងបាត់ដំបង ធ្វើឲ្យប៉ះពាល់យ៉ាងខ្លាំងដល់សន្តិសុខសង្គម។
នៅក្នុងក្រុងបាត់ដំបង នេះដែលល្បែងភ្នាល់ទឹកភ្លៀងកំពុងកក្រើកយ៉ាងពេញបន្ទុកក្រោយពេលមាន ភ្លៀងធ្លាក់ជាបន្តបន្ទាប់ចាប់តាំងពីដើមខែឧសភារហូតមក ហើយមិនឃើញមន្ត្រីអាជ្ញាធរនិងសមត្ថកិច្ច ចាត់វិធានការបង្ក្រាបឡើយ។ សេចក្ដីរាយការណ៍ពីប្រជាពលរដ្ឋរស់នៅភូមិអញ៉ាញ សង្កាត់អូរចារ បានឲ្យដឹងថា ក្នុងមូលដ្ឋានរបស់ពួកគាត់មានអ្នកបើកល្បែងភ្នាល់ទឹកភ្លៀងឈ្មោះ តាល់ ដែលគេស្គាល់ថាជាប្អូនធម៌របស់លោក យឹម វិចិត្រ អធិការនគរបាលក្រុងបាត់ដំបង។ ហេតុនេះហើយទើបប្រជាពលរដ្ឋអំពាវនាវឲ្យលោក ចន្ទ សុផល អភិបាលខេត្តបាត់ដំបង និងលោក ស ថេត ស្នងការនគរបាលខេត្តបាត់ដំបង ចាត់វិធានការទប់ស្កាត់បទល្មើសគ្រឿងញៀននិងល្បែងស៊ីសងក្នុងក្រុង បាត់ដំបងជាបន្ទាន់ ព្រោះបទល្មើសទាំងនោះកំពុងធ្វើឲ្យប៉ះពាល់យ៉ាងខ្លាំងដល់សន្តិសុខ សង្គម ក៏ដូចជាការរស់នៅរបស់ប្រជាពលរដ្ឋ។ការបណ្តោយឲ្យមានល្បែងស៊ីសង គ្រប់ប្រភេទនៅតាមមូលដ្ឋាន គឺជាសញ្ញាបង្ហាញពីការបរាជ័យនៃការអនុវត្តគោលនយោបាយភូមិ-ឃុំមាន សុវត្ថិភាពរបស់ក្រសួងមហាផ្ទៃ និងបរាជ័យក្នុងការអនុវត្តខ្លឹមសារច្បាប់ស្ដីពីល្បែងស៊ីសង។ឥទ្ធិពល ល្បែងស៊ីសង គឺជាប្រភពចម្បងនៃអសន្តិសុខសង្គម ដូចជាអំពើហិង្សា ចោរកម្ម ហើយអាចកើតមានការកាប់សម្លាប់។ ការបណ្តោយឲ្យកើតមានល្បែងស៊ីសង ហាក់ដូចជាដើរបញ្ច្រាសពីយុទ្ធសាស្ត្រកាត់បន្ថយភាពក្រីក្ររបស់ រដ្ឋាភិបាល និងដើរបញ្ច្រាសពីគោលនយោបាយភូមិ-ឃុំមានសុវត្ថិភាពរបស់ក្រសួង មហាផ្ទៃអាជ្ញាធរខេត្តជាអ្នកទទួលខុសត្រូវខ្ពស់លើករណីនេះ។
ល្បែងស៊ីសងពាក់ព័ន្ធច្រើនទី១ រត់ចោលស្រុកទី២ជំពាក់លុយគេនិង ទី៣ ពាក់ព័ន្ធចោរលួចចោរប្លង់។ច្បាប់ស្ដីពីការបង្ក្រាបល្បែងស៊ីសង ឆ្នាំ១៩៩៦ មាត្រា៥ ចែងថា ចំពោះអ្នកបើកល្បែងស៊ីសង អ្នកកាន់កាប់ល្បែងស៊ីសង អ្នកចាត់ចែង និងភ្នាក់ងារស៊ីសង ត្រូវផ្ដន្ទាទោសពិន័យជាប្រាក់ពី ៥លានរៀលដល់ ២០លានរៀល និងដាក់គុកពី ១ឆ្នាំដល់ ៥ឆ្នាំ៕
ប្រភព៖ចលនាសង្គម
ចំនួនអ្នកទស្សនា
- ថ្ងៃនេះ1581
- ម្សិលមិញ2851
- សប្តាហ៍នេះ7691
- ខែនេះ233361
- ឆ្នាំនេះ233361
- សរុប20675817